Google Maps-ის ყველაზე დიდი განახლება ბოლო 10 წელზე მეტი ხნის განმავლობაში: Gemini-მ ნავიგაცია შეცვალა

Google Maps-მა ორი უმძლავრესი ფუნქცია დაამატა, რომლებსაც Gemini-ს ხელოვნური ინტელექტი მართავს. კომპანიაში ამბობენ, რომ ეს ბოლო ათწლეულის ყველაზე მასშტაბური ცვლილებაა. ერთადერთი „მინუსი“ ისაა, რომ გლობალურ გავრცელებამდე ცოტა ლოდინი მოგვიწევს.

„Ask Maps“ – შენი პირადი ასისტენტი რუკაზე

პირველი და ყველაზე საინტერესო სიახლე Ask Maps-ია. ეს არის ჩატ-ბოტი პირდაპირ აპლიკაციაში, რომელსაც შეგიძლია ძალიან დეტალური და სპეციფიკური კითხვები დაუსვა. მაგალითად: „ტელეფონი მიჯდება და სად დავტენო ისე, რომ ყავის რიგში დგომა არ მომიწიოს?“ ან „არის სადმე ახლოს ჩოგბურთის კორტი, რომელიც ღამე განათებულია?“

Gemini ამ პასუხებს 300 მილიონზე მეტი ადგილისა და 500 მილიონი მომხმარებლის გამოცდილებაზე დაყრდნობით აგენერირებს. გარდა ამისა, მას შეუძლია სრული სამამოგზაურო გეგმა (itinerary) შეგიდგინოს – უბრალოდ უთხარი, საით მიდიხარ და ის გზად საინტერესო გაჩერებებს შემოგთავაზებს.

იმერსიული ნავიგაცია და მეტი დეტალი მძღოლებისთვის

მეორე განახლება, Immersive Navigation, მძღოლებისთვისაა. ახლა რუკა უფრო ჭკვიანურად გეტყვით, რა „ფასად“ გიჯდებათ ალტერნატიული გზით წასვლა და დანიშნულების ადგილის წინასწარ დათვალიერებას Street View-ს მეშვეობით შეძლებთ. საინტერესოა, რომ Google Maps და Waze ახლა მონაცემებს ერთმანეთს უზიარებენ, რომ რეალურ დროში უფრო ზუსტი ინფორმაცია მივიღოთ გზებზე.

კონფიდენციალურობა და რეკლამები

ბუნებრივია, ჩნდება კითხვები პერსონალიზაციაზე. Ask Maps თქვენს ძიების ისტორიას და შენახულ ადგილებს გააანალიზებს, რომ რჩევები თქვენზე იყოს მორგებული. Google-ში ამბობენ, რომ ეს მონაცემები სხვა აპლიკაციებთან (მაგ. Gmail) არ არის დაკავშირებული. რაც შეეხება რეკლამებს – კომპანია ჯერჯერობით მათ ჩაშენებას არ აპირებს, თუმცა სამომავლოდ ამ შესაძლებლობას არ გამორიცხავს.

ამ ეტაპზე ფუნქციები აშშ-სა და ინდოეთში ეშვება Android და iOS პლატფორმებზე, სხვა ქვეყნებისთვის კი უახლოეს თვეებში გახდება ხელმისაწვდომი.